امت نیوز ڈیسک //
اسلام آباد/واشنگٹن: امریکی صدر ڈونلڈ ٹرمپ نے ایران کے ساتھ جاری جنگ بندی میں توسیع کا اعلان کرتے ہوئے واضح کیا ہے کہ ایران پر عائد ناکہ بندی برقرار رہے گی۔ ان کا کہنا تھا کہ یہ فیصلہ پاکستان کی اپیل پر کیا گیا تاکہ سفارتی عمل کو مزید وقت دیا جا سکے۔
صدر ٹرمپ نے اپنے بیان میں کہا کہ ایران کی داخلی سیاسی صورتحال غیر یقینی ہے، اس لیے فوری اور جامع پیش رفت ممکن نہیں، تاہم جنگ بندی میں توسیع سے بات چیت کے دروازے کھلے رہیں گے۔ دوسری جانب، انہوں نے امریکی افواج کو ہدایت دی ہے کہ ناکہ بندی جاری رکھی جائے۔
ادھر ایران نے اس اعلان کو بے معنی قرار دیتے ہوئے سخت ردعمل ظاہر کیا ہے۔ ایرانی قیادت کے ایک سینئر مشیر کے مطابق، جنگ بندی میں توسیع کے ساتھ ناکہ بندی جاری رکھنا دراصل جنگ کے مترادف ہے۔ ایرانی فوج نے خبردار کیا ہے کہ کسی بھی ممکنہ حملے کا “فوری اور بھرپور جواب” دیا جائے گا۔
پاکستان کے وزیر اعظم شہباز شریف نے اس پیش رفت کا خیرمقدم کرتے ہوئے صدر ٹرمپ کا شکریہ ادا کیا۔ انہوں نے کہا کہ اس فیصلے سے سفارت کاری کو مزید وقت ملے گا اور امید ظاہر کی کہ دونوں فریق جنگ بندی کا احترام کرتے ہوئے ایک پائیدار امن معاہدے کی طرف بڑھیں گے۔
