امت نیوز ڈیسک //
سرینگر، 3 جولائی: وزیرِ اعظم نریندر مودی نے سالانہ امرناتھ یاترا پر جانے والے عقیدت مندوں سے اپیل کی ہے کہ وہ اپنے سفری اخراجات کا کم از کم 10 فیصد حصہ جموں و کشمیر میں تیار ہونے والی مقامی مصنوعات کی خریداری پر خرچ کریں تاکہ یہاں کے نوجوانوں اور مقامی خاندانوں کی روزی روٹی کو تقویت مل سکے۔
اپنے خصوصی پیغام میں وزیرِ اعظم نے یاتریوں سے "ووکل فار لوکل” مہم کو فروغ دینے کی اپیل کرتے ہوئے کہا کہ مقامی مصنوعات کی خریداری سے جموں و کشمیر کی معیشت کو فائدہ پہنچے گا۔
انہوں نے کہا کہ امرناتھ یاترا صرف ایک مذہبی سفر نہیں بلکہ جموں و کشمیر کے عوام کی مہمان نوازی اور خدمت کے جذبے کی بھی عکاسی کرتی ہے۔ ان کے مطابق یاترا کے مختلف مراحل پر پونی مالکان، پٹھو، دکاندار اور دیگر مقامی افراد عقیدت مندوں کی بے لوث خدمت کرتے ہیں، جو ہندوستانی ثقافت اور انسان دوستی کی بہترین مثال ہے۔
وزیرِ اعظم نے امرناتھ یاترا کو ایک عظیم روحانی نعمت قرار دیتے ہوئے کہا کہ ہر سال ملک اور بیرونِ ملک سے لاکھوں عقیدت مند مختلف زبانوں اور ثقافتوں سے تعلق رکھنے کے باوجود بھگوان شیو کے درشن کے لیے اس مقدس یاترا میں شریک ہوتے ہیں، جو ہندوستان کے اتحاد اور تنوع کی خوبصورت تصویر پیش کرتی ہے۔
مودی نے یاتریوں سے پانچ عہد کرنے کی بھی اپیل کی۔ انہوں نے کہا کہ یاتری راستوں پر صفائی کا خاص خیال رکھیں، انتظامیہ اور سکیورٹی اداروں کی ہدایات پر عمل کریں، مقامی مصنوعات خریدیں، یاترا کے اختتام پر رکشا بندھن کے موقع پر "ایک پیڑ ماں کے نام” مہم کے تحت اپنے بہن بھائیوں کو ایک پودا تحفے میں دیں، اور سال بھر "نیشن فرسٹ” کے جذبے کے ساتھ کام کریں۔
وزیرِ اعظم نے شری امرناتھ جی شرائن بورڈ، جموں و کشمیر حکومت، بھارتی فوج، سی آر پی ایف، جموں و کشمیر پولیس، آئی ٹی بی پی، بی ایس ایف، این ڈی آر ایف، ڈاکٹروں، طبی عملے، صفائی کارکنوں، انتظامی اہلکاروں اور رضاکاروں کی خدمات کو بھی سراہا۔
انہوں نے آخر میں دعا کی کہ تمام یاتریوں کا سفر محفوظ، کامیاب اور روحانی برکتوں سے بھرپور ہو۔
