امت نیوز ڈیسک//
نئی دہلی، 22 اپریل: پٹیالہ ہاوس کورٹ نے بدھ کے روز بارہمولہ کے رکنِ پارلیمنٹ انجینئر رشیدکی عبوری ضمانت کی درخواست پر فیصلہ محفوظ کر لیا۔
انجینئر رشید، جو اس وقت این آئی اے کے ایک مقدمے میں حراست میں ہیں، نے اپنے شدید علیل والد سے ملاقات کے لیے عارضی رہائی کی درخواست دائر کی تھی۔ اطلاعات کے مطابق ان کے والد وینٹی لیٹر پر ہیں۔
سماعت کے دوران این آئی اے نے خفیہ رپورٹ کا حوالہ دیتے ہوئے عبوری ضمانت کی مخالفت کی، تاہم اس نے متبادل کے طور پر حراستی پیرول (کسٹڈی پیرول) پر غور کی گنجائش ظاہر کی۔
عدالت نے فریقین کے دلائل سننے کے بعد فیصلہ محفوظ کر لیا ہے، جسے 24 اپریل کو سنایا جائے گا۔
دریں اثنا، انجینئر رشید کی قانونی ٹیم نے ان کے والد کی نازک حالت کے پیشِ نظر فوری راحت کی ضرورت پر زور دیا، جبکہ استغاثہ نے سکیورٹی خدشات کی بنیاد پر اپنی مخالفت برقرار رکھی۔
