امت نیوز ڈیسک //
شوپیاں، 7 مئی: جنوبی کشمیر کے ضلع شوپیاں میں بدھ کے روز سینکڑوں طلبہ اور والدین نے جامعہ سراج العلوم کو دوبارہ کھولنے کے مطالبے کو لے کر پرامن احتجاج کیا۔
مظاہرین نے ڈپٹی کمشنر دفتر کے باہر دھرنا دیا اور ہاتھوں میں “ہمارا مستقبل بچاؤ” کے پلے کارڈز اٹھا رکھے تھے۔ احتجاج میں مختلف اضلاع سے تعلق رکھنے والے وہ طلبہ شریک تھے جو اس ادارے میں زیر تعلیم ہیں۔
ایک گیارہویں جماعت کے طالب علم نے کہا،”ہم اپنے اسکول کو دوبارہ کھولنے کا مطالبہ کر رہے ہیں۔ ہم امن پر یقین رکھتے ہیں اور چاہتے ہیں کہ ہماری تعلیم جاری رہے۔“
واضح رہے کہ 24 اپریل کو جامعہ سراج العلوم کو غیر قانونی ادارہ قرار دیتے ہوئے غیر قانونی سرگرمیوں کی روک تھام کے قانون (یو اے پی اے) کے تحت پابندی عائد کی گئی تھی۔ یہ کارروائی سینئر سپرنٹنڈنٹ آف پولیس شوپیاں کی جانب سے تیار کردہ ڈوزیئر کی بنیاد پر عمل میں لائی گئی۔ بعد ازاں ضلعی انتظامیہ نے ادارے کے احاطے میں غیر مجاز افراد کے داخلے پر پابندی لگا دی۔
