امت نیوز ڈیسک //
نئی دہلی/لندن، 17 اپریل: بھارت اور پاکستان کے ماہرین، سابق سفارت کاروں اور بعض سیاسی شخصیات کے درمیان مئی 2025 کی کشیدگی کے بعد کم از کم چار خفیہ نوعیت کی ملاقاتیں ہو چکی ہیں۔ ہندوستان ٹائمز کے مطابق یہ ملاقاتیں “ٹریک 1.5” اور “ٹریک 2” سفارتی فارمیٹس کے تحت مختلف ممالک میں منعقد ہوئیں۔
رپورٹ کے مطابق، آپریشن سندور کے تقریباً دو ماہ بعد جولائی 2025 میں انٹرنیشنل انسٹی ٹیوٹ فار اسٹریٹیجک اسٹڈیز کے زیر اہتمام لندن میں پہلی “ٹریک 1.5” ملاقات ہوئی، جس میں حاضر سروس اور ریٹائرڈ حکام نے شرکت کی۔ تاہم بھارت کی جانب سے حاضر سروس اہلکار شریک نہیں ہوئے جبکہ پاکستان کی طرف سے فوجی نمائندگی موجود تھی۔
اکتوبر 2025 میں عمان کے دارالحکومت مسقط میں ایک اور ٹریک 1.5 اجلاس منعقد ہوا، جسے بھی انٹرنیشنل انسٹی ٹیوٹ فار اسٹریٹیجک اسٹڈیز نے ترتیب دیا۔
اس کے بعد دسمبر 2025 میں تھائی لینڈ میں ایک ٹریک 2 اجلاس ہوا، جس میں ماہرین، اساتذہ اور سابق عہدیداروں نے شرکت کی، جبکہ فروری 2026 میں ایک اور ٹریک 2 ملاقات منعقد ہوئی جسے ایک برطانوی تھنک ٹینک نے سہولت فراہم کی۔
