امت نیوز ڈیسک//
نئی دہلی: واشنگٹن ڈی سی میں وائٹ ہاؤس کوریسپونڈنٹس ڈنر کے دوران پیش آنے والے فائرنگ کے واقعے کے بعد بھارت کے وزیر اعظم نریندر مودی نے امریکی قیادت کے محفوظ رہنے پر اطمینان کا اظہار کیا ہے۔ اپنے سوشل میڈیا پیغام میں انہوں نے کہا کہ انہیں یہ جان کر خوشی ہوئی کہ امریکی صدر ڈونلڈ ٹرمپ خاتون اول ملانیا ٹرمپ اور نائب صدر جے ڈی وینس اس واقعے میں محفوظ رہے۔
انہوں نے اس موقع پر تشدد کی مذمت کرتے ہوئے کہا کہ جمہوریت میں تشدد کی کوئی جگہ نہیں۔ یہ واقعہ ہفتہ کی شب اس وقت پیش آیا جب واشنگٹن کے ایک ہوٹل میں منعقدہ سالانہ تقریب کے دوران اچانک فائرنگ کی آوازیں سنائی دیں، جس کے بعد سیکیورٹی اہلکاروں نے فوری کارروائی کرتے ہوئے صدر اور دیگر اہم شخصیات کو محفوظ مقام پر منتقل کر دیا۔
تقریب میں موجود صحافیوں، سیاسی رہنماؤں اور مہمانوں میں خوف و ہراس پھیل گیا اور کئی افراد میزوں کے نیچے پناہ لینے پر مجبور ہوگئے۔ امریکی سیکیورٹی اداروں، بالخصوص سیکرٹ سروس نے فوری ردعمل دیتے ہوئے حملہ آور کو گرفتار کر لیا۔ بعد ازاں صدر ٹرمپ نے سوشل میڈیا پر بیان جاری کرتے ہوئے سیکیورٹی اداروں کی تعریف کی اور کہا کہ صورتحال کو قابو میں لے لیا گیا ہے۔
تحقیقات کے مطابق حملہ آور کی شناخت کیلیفورنیا سے تعلق رکھنے والے 31 سالہ شخص کے طور پر ہوئی ہے، جسے حراست میں لے کر اس کے خلاف متعدد وفاقی مقدمات درج کیے گئے ہیں۔ ابتدائی اطلاعات کے مطابق حملہ آور اکیلا تھا، تاہم اس کے محرکات کی تفتیش جاری ہے۔ واقعے کے بعد تقریب کو فوری طور پر خالی کرا لیا گیا جبکہ علاقے میں سیکیورٹی انتہائی سخت کر دی گئی۔ نیشنل گارڈ کے اہلکار بھی تعینات کیے گئے اور کسی کو دوبارہ اندر جانے کی اجازت نہیں دی گئی۔
