آصف خان
راجوری، 25 اپریل: عوامی اتحاد نے راجوری کے ساج علاقے میں “نشہ مکت جموں و کشمیر” مہم کے تحت ایک بڑے بیداری پروگرام کا انعقاد کیا، جس کا مقصد نوجوانوں کو منشیات کے بڑھتے ہوئے خطرے کے خلاف متحرک کرنا تھا۔ اس پروگرام کی قیادت تنظیم کے صدر وقار ایچ بھٹی نے کی، جبکہ اس میں سرکاری افسران، سیکورٹی نمائندگان اور سول سوسائٹی کے اراکین نے شرکت کی۔
تقریب میں ایس ڈی ایم تھنہ منڈی عابد حسین ، ایگزیکٹو آفیسر جے اینڈ کے وقف بورڈ اے بی قیوم میر، بھارتی فوج کی 43 آر آر کے نمائندے، نائب تحصیلدار ساج، گورنمنٹ ہائر سیکنڈری اسکول ساج کی پرنسپل سائرہ چودھری، جی ایم سی راجوری کے اسسٹنٹ پروفیسر ڈاکٹر خالد اور دیگر معزز شہری موجود تھے۔ پروگرام کی نظامت روحی بھٹی نے کی۔
اجتماع سے خطاب کرتے ہوئے وقار ایچ بھٹی نے لیفٹیننٹ گورنر منوج سنہا کی جانب سے شروع کی گئی منشیات مخالف مہم کو سراہتے ہوئے اسے آنے والی نسلوں کے تحفظ کے لیے ایک دور اندیش قدم قرار دیا۔ انہوں نے منشیات کے خاتمے کے لیے انتظامیہ کے ساتھ مکمل تعاون کا یقین دلایا۔
انہوں نے دیرپا حل پر زور دیتے ہوئے حکومت سے دیہی علاقوں میں کھیلوں کے بنیادی ڈھانچے کو مضبوط بنانے کا مطالبہ کیا۔ ان کا کہنا تھا کہ ہر 8 سے 10 پنچایتوں کے کلسٹر کے لیے ایک بڑا اسٹیڈیم قائم کیا جانا چاہیے تاکہ نوجوانوں کو مثبت سرگرمیوں میں مصروف رکھا جا سکے۔
انہوں نے کہا، “ہم اپنے بچوں کو اسٹیڈیم میں دیکھنا چاہتے ہیں، منشیات کے چنگل میں نہیں”، اور اس بات پر زور دیا کہ کھیلوں کی سہولیات نوجوانوں کو نشے سے دور رکھنے میں اہم کردار ادا کر سکتی ہیں۔
پروگرام کے اختتام پر مقامی نوجوانوں نے منشیات سے پاک معاشرے کے قیام کا عہد کیا، جبکہ تنظیم نے علاقے میں بہتر تعلیم، صحت اور کھیلوں کی سہولیات کے فروغ کے لیے اپنی جدوجہد جاری رکھنے کے عزم کا اعادہ کیا۔
