ویب ڈیسک//
مسجد الحرام اور مسجد نبویؐ کے امور کی صدارت نے اعلان کیا ہے کہ رواں سال حج کے موقع پر خطبۂ عرفات کو 35 زبانوں میں ترجمہ کر کے اس کے ڈیجیٹل پلیٹ فارمز اور متعلقہ ذرائع کے ذریعے نشر کیا جائے گا۔
سعودی خبر رساں ادارے سعودی پریس ایجنسی کے مطابق اس اقدام کا مقصد دنیا بھر کے مسلمانوں تک خطبے کا پیغام پہنچانا اور اسلام کی اعتدال پسندی کی تعلیمات کو فروغ دینا ہے۔
صدارت کے سربراہ شیخ عبدالرحمٰن السدیس کا کہنا ہے کہ یہ اقدام سعودی عرب کے اسلام اور مسلمانوں کی خدمت کے عزم کی عکاسی کرتا ہے اور قیادت کی جانب سے حجاج کرام کے لیے خصوصی توجہ کو ظاہر کرتا ہے۔
انہوں نے کہا کہ جدید ٹیکنالوجی اور ڈیجیٹل پلیٹ فارمز کے ذریعے حج کے عالمی اثرات کو زیادہ سے زیادہ بڑھانے میں بھی اس منصوبے کا اہم کردار ہوگا۔
الشیخ السدیس کے مطابق خطبۂ عرفات کے ترجمے کا منصوبہ صدارت کا ایک اہم اقدام ہے، جو کئی سال کے تجربے پر مبنی ہے اور اس کے ذریعے مختلف عالمی زبانوں میں دینی مواد کو فروغ دینے میں مدد ملتی ہے۔
شیخ السدیس نے مزید بتایا کہ اس مقصد کے لیے صدارت نے اپنی تکنیکی اور میڈیا صلاحیتوں کے ساتھ ساتھ ماہر ٹیموں کو بھی متحرک کر دیا ہے، تاکہ خطبۂ عرفات کو اعلیٰ معیار اور پیشہ ورانہ انداز میں دنیا بھر کے زیادہ سے زیادہ افراد تک پہنچایا جا سکے۔
