امت نیوز ڈیسک //
سرینگر، 31 مئی: کشمیر میں اتوار کے روز پیش آنے والے دو الگ الگ ڈوبنے کے واقعات میں ایک کمسن بچے کی موت ہوگئی جبکہ ایک والد اپنے بیٹے کو بچانے کی کوشش کے دوران دریا میں بہہ گیا۔
تفصیلات کے مطابق سرینگر کے جواہر نگر کے رہائشی محمد اشرف میر (42) اپنے اہل خانہ کے ساتھ پہلگام گئے ہوئے تھے۔ اس دوران ان کا بیٹا لنگن بل کے مقام پر حادثاتی طور پر لدر دریا میں پھسل کر گر گیا۔
بیٹے کو بچانے کے لیے محمد اشرف میر فوراً دریا میں کود پڑے، تاہم تیز بہاؤ کے باعث وہ اپنا توازن برقرار نہ رکھ سکے اور پانی کی موجوں میں بہہ گئے۔
مقامی لوگوں نے بروقت کارروائی کرتے ہوئے بچے کو بحفاظت بچا لیا، جبکہ محمد اشرف میر کی تلاش کے لیے ایس ڈی آر ایف اور رافٹنگ ٹیموں کی جانب سے سرچ آپریشن جاری ہے۔
دوسرے واقعے میں شمالی کشمیر کے ٹنگمرگ علاقے کے چھن پورہ میں تین سالہ بچے ابو بکر کی نہر میں ڈوبنے سے موت ہوگئی۔
بچے کو پانی سے نکالنے کے بعد فوری طور پر سب ڈسٹرکٹ اسپتال ٹنگمرگ منتقل کیا گیا، تاہم ڈاکٹروں نے اسے مردہ قرار دے دیا۔
ان دونوں افسوسناک واقعات کے بعد علاقے میں غم کی لہر دوڑ گئی ہے۔
