امت نیوز ڈیسک //
سرینگر، 17 جون : جنوبی کشمیر کے معروف سیاحتی مقام پہلگام کے قریب ارُو ویلی روڈ پر بدھ کے روز ایک المناک سڑک حادثے میں دو افراد جاں بحق جبکہ چھ دیگر زخمی ہو گئے۔
سرکاری ذرائع کے مطابق ایک مقامی کار ارُو ویلی روڈ پر سفر کے دوران ڈرائیور کے قابو سے باہر ہو کر حادثے کا شکار ہو گئی۔ حادثے کے نتیجے میں دو افراد موقع پر ہی جان کی بازی ہار گئے جبکہ گاڑی میں سوار چھ دیگر افراد زخمی ہو گئے۔
حادثے کی اطلاع ملتے ہی مقامی انتظامیہ، پولیس اور امدادی ٹیمیں موقع پر پہنچ گئیں اور زخمیوں کو فوری طور پر قریبی طبی مرکز منتقل کیا گیا، جہاں ان کا علاج جاری ہے۔
ابتدائی اطلاعات کے مطابق جاں بحق ہونے والے افراد کا تعلق ڈائلگام، اننت ناگ سے بتایا جا رہا ہے، تاہم ان کی شناخت کے حوالے سے سرکاری تصدیق کا انتظار ہے۔
حکام نے بتایا کہ حادثے کی اصل وجہ ابھی سامنے نہیں آئی ہے اور واقعے کی مکمل جانچ کی جا رہی ہے۔
پولیس نے حادثے کا نوٹس لیتے ہوئے مزید تحقیقات شروع کر دی ہیں۔
