امت نیوز ڈیسک //
: وزیرِ دفاع راج ناتھ سنگھ نے کہا ہے کہ بھارت مستقبل میں پاکستان کے ساتھ صرف پاکستان کے زیرِ قبضہ کشمیر کے مسئلے پر ہی بات چیت کرے گا۔ انہوں نے واضح کیا کہ پی او کے بھارت کا اٹوٹ حصہ ہے جو پاکستان کے غیر قانونی قبضے میں ہے۔
کارگل وجے دیوس کے موقع پر دراس میں واقع کارگل وار میموریل پر منعقدہ تقریب سے خطاب کرتے ہوئے راج ناتھ سنگھ نے کہا کہ پاکستان نے دہشت گردی کو اپنی ریاستی پالیسی کا حصہ بنا لیا ہے اور وہاں کی فوجی اسٹیبلشمنٹ اور دہشت گرد تنظیموں میں کوئی فرق نہیں رہا۔انہوں نے کہا کہ آپریشن سندور کے ذریعے بھارتی فوج نے دہشت گردوں اور ان کے سرپرستوں کو مؤثر جواب دیا ہے اور بھارت ہر قسم کی جارحیت یا خودمختاری کو چیلنج کرنے والی کسی بھی کارروائی کا پہلے سے زیادہ سخت جواب دینے کی صلاحیت رکھتا ہے۔
راج ناتھ سنگھ نے بھارت اور پاکستان کا موازنہ کرتے ہوئے کہا کہ بھارت ٹیکنالوجی، اختراع، خلائی تحقیق، اسٹارٹ اپس اور سیمی کنڈکٹرز کے میدان میں ترقی کر رہا ہے، جبکہ پاکستان دہشت گردی، انتہا پسندی اور سرحد پار دراندازی کو فروغ دے رہا ہے۔
انہوں نے کہا کہ بھارتی مسلح افواج ہر قسم کے دشمنانہ عزائم کا مقابلہ کرنے کے لیے پوری طرح تیار ہیں۔ وزیرِ دفاع نے کارگل جنگ کے شہدائ کو خراجِ عقیدت پیش کرتے ہوئے کہا کہ وطن کی خودمختاری اور علاقائی سالمیت کے لیے اپنی جانوں کا نذرانہ پیش کرنے والے جوانوں کی قربانیاں ہمیشہ قوم کو متاثر کرتی رہیں گی۔
