امت نیوز ڈیسک //
نئی دہلی: مرکزی وزیر پرہلاد جوشی نے وزارتِ تعلیم کا اضافی چارج سنبھالنے کے بعد کہا کہ وزیر اعظم نریندر مودی نے ان پر مکمل اعتماد کرتے ہوئے یہ اہم ذمہ داری سونپی ہے اور وہ اس اعتماد پر پورا اترنے کی بھرپور کوشش کریں گے۔
چارج سنبھالنے کے بعد میڈیا سے گفتگو کرتے ہوئے پرہلاد جوشی نے کہا کہ وہ گزشتہ روز کرناٹک میں تھے، رات کو دہلی پہنچے اور آج صبح وزارتِ تعلیم کا باضابطہ چارج سنبھال لیا۔ انہوں نے کہا کہ وہ وزارت کے تمام معاملات، زیر التوا فیصلوں اور مختلف شعبوں کے کام کا تفصیلی جائزہ لے رہے ہیں۔
انہوں نے بتایا کہ آج دن بھر وزارت کے سینئر افسران کے ساتھ مسلسل اجلاس منعقد ہوئے، جن میں مختلف امور پر تبادلہ خیال کیا گیا۔ ان کے مطابق وزارتِ تعلیم ایک بہت بڑا محکمہ ہے اور یہ ان کے لیے ایک نیا شعبہ بھی ہے، اس لیے وہ پہلے وزارت کے کام کاج کو مکمل طور پر سمجھنا چاہتے ہیں۔
پرہلاد جوشی نے کہا کہ جب وہ وزارت کے تمام معاملات سے مکمل طور پر واقف ہو جائیں گے تو مستقبل کی حکمت عملی اور دیگر اہم امور پر تفصیل سے بات کریں گے۔
