امت نیوز ڈیسک //
سوپور: شمالی کشمیر کے ضلع بارہمولہ کے کراکنشیون کالونی میں پولیس نے ایک مکان سے دھماکہ خیز مواد کا ایک ذخیرہ برآمد کیا ہے۔ پولیس ذرائع کے مطابق ٹارگٹڈ آپریشن کے دوران دیسی ساختہ دھماکہ خیز آلات (IEDs) کی تیاری میں استعمال ہونے والے مواد کو ضبط کرلیا گیا ہے۔ پولیس نے بتایا کہ "آج تقریباً آٹھ بجے پولیس چوکی تارزو اور 52RR/CRpf کے ساتھ کراکنکشیون گاؤں میں سوپور کے ایف آئی آر نمبر 307/2023 کے سلسلہ میں آپریشن شروع کیا گیا۔
تلاشی کے دوران راشد نجار کے گھر سے دھماکہ خیز مواد، آئی ای ڈیز، میگزین کے ساتھ ایک زنگ آلود پستول اور ایس ایل آر/ اے کے 47/ پستول کا گولہ بارود ملا، جو کراکنکشیون سوپور کے مہلوک ملی ٹینٹ قیوم نجار کا بھائی ہے۔ اس ضمن میں راشد نجار کو بھی حراست میں لے لیا گیا ہے۔
پولیس کی جانب سے شہر میں سکیورٹی کو برقرار رکھنے اور ممکنہ خطرات کو روکنے کے لیے جاری کوششوں کی نشاندہی کی گئی ہے۔ ذرائع کے مطابق یہ کارروائی مصدقہ انٹیلی جنس معلومات کی بنیاد پر کی گئی۔ اس دوران پولیس نے کیس کے حوالے سے مزید معلومات جاری نہیں کی ہیں تاہم توقع ہے کہ تفتیش آگے بڑھنے کے ساتھ ہی مزید تفصیلات سامنے آئیں گی۔
