بڈگام میں نیشنل کانفرنس کی انتخابی مہم میں حصہ نہیں لوں گا: آغا روح اللہ

امت نیوز ڈیسک //
سرینگر، 13 اکتوبر : سری نگر کے رکن پارلیمان اور نیشنل کانفرنس کے سینئر رہنما آغا روح اللہ نے کہا ہے کہ وہ بڈگام اسمبلی ضمنی انتخابات میں پارٹی کی انتخابی مہم میں حصہ نہیں لیں گے۔ ان کا کہنا ہے کہ ان کا فیصلہ اصولی بنیادوں پر ہے، نہ کہ کسی سیاسی حکمتِ عملی کے تحت۔

آغا روح اللہ نے کشمیر نیوز سروس سے بات کرتے ہوئے کہا کہ اگرچہ امیدوار کا فیصلہ پارٹی کرے گی، لیکن موجودہ حالات میں وہ انتخابی مہم میں شامل ہونے کی کوئی وجہ نہیں دیکھتے۔

ان کا کہنا تھا کہ ووٹروں کے ساتھ ان کا تعلق ہمیشہ اعتماد، جوابدہی اور وعدوں کی تکمیل پر مبنی رہا ہے، نہ کہ پارٹی دباؤ پر۔

انہوں نے افسوس کا اظہار کرتے ہوئے کہا کہ گزشتہ اسمبلی دور کے دوران جو وعدے عوام سے کیے گئے تھے، وہ پورے نہیں ہوئے۔

“اگر پارٹی چاہتی ہے کہ میں عوام کے سامنے جاؤں تو چند نکات ہیں جن پر فوری عمل ہونا چاہیے، اس کے بعد ہی میں اپنی شمولیت پر غور کروں گا،” انہوں نے کہا۔

آغا روح اللہ نے کہا کہ ان کی سیاسی وابستگی ہمیشہ اصولوں اور عوامی خدمت پر مبنی رہی ہے۔ “میں نے ہمیشہ اصولوں کی سیاست کی ہے، وعدے نبھائے ہیں اور عوام سے جو عہد کیا، اس پر قائم ہوں۔ میں کسی کے لیے بھی اپنے وعدے نہیں توڑ سکتا۔”

انہوں نے پارٹی قیادت سے سوال کیا کہ گزشتہ اسمبلی کے دوران جو منشور اور وعدے کیے گئے، ان پر کتنا عمل ہوا؟
“میں نے ان سے پوچھا کہ اسمبلی کے بعد آپ نے کون سا کام کیا؟ کون سی وعدے پورے کیے؟ جب تک ان پر عمل نہیں ہوتا، میں عوام کے سامنے کیوں جاؤں؟”

بڈگام سیٹ پر کسی باہر کے امیدوار کے ممکنہ کھڑے ہونے کی خبروں پر آغا روح اللہ نے کہا کہ وہ اپنے ووٹ کے خود مالک ہیں۔

“جو بھی امیدوار بننا چاہے، بنے۔ میرا ووٹ میرا حق ہے، میں خود فیصلہ کروں گا۔ عوام کو اختیار ہے کہ وہ جسے چاہیں اپنا نمائندہ منتخب کریں،” انہوں نے کہا۔

آغا روح اللہ نے واضح کیا کہ اگر پارٹی سنجیدگی سے عوامی مسائل پر عملدرآمد کا ارادہ ظاہر کرے — بشمول ریزرویشن پالیسی اور کابینہ فیصلوں کی تکمیل — تو وہ اپنے فیصلے پر نظرِ ثانی کر سکتے ہیں۔

“اگر میں پارٹی کی جانب سے سنجیدہ اقدامات دیکھوں تو اپنی شرکت پر غور کر سکتا ہوں، لیکن فی الحال میں کسی انتخابی مہم میں شامل نہیں ہوں گا،” انہوں نے کہا۔

ان کا کہنا تھا کہ بڈگام کے عوام اپنے ووٹ کے اصل مالک ہیں، اور وہ کسی پر اثر انداز نہیں ہوں گے بلکہ اگر کوئی مشورہ چاہے تو وہ رہنمائی ضرور فراہم کریں گے۔(کے این ایس)