امت نیوز ڈیسک //
سری نگر، 9 فروری: جموں و کشمیر حکومت نے پیر کے روز قانون ساز اسمبلی کو مطلع کیا کہ منریگا (مہاتما گاندھی نیشنل رورل ایمپلائمنٹ گارنٹی ایکٹ) کے تحت کام کرنے والے تقریباً 3,800 سپورٹ اسٹاف کو مستقل کرنے سے متعلق فی الحال کوئی تجویز زیر غور نہیں ہے۔
یہ جانکاری دیہی ترقی و پنچایتی راج محکمے کے وزیر انچارج نے ایم ایل اے میر محمد فیاض کے ایک سوال کے تحریری جواب میں دی۔ حکومت کے مطابق، منریگا کے تحت کام کرنے والا یہ تمام عملہ مکمل طور پر عارضی اور کنٹریکٹ کی بنیاد پر تعینات ہے، اور ان کی تقرری کسی بھی منظور شدہ مستقل اسامی کے خلاف نہیں کی گئی ہے۔
حکومت نے بتایا کہ منریگا سپورٹ اسٹاف پنچایت، بلاک، ضلع، ڈویژنل اور یوٹی سطح پر خدمات انجام دے رہا ہے اور دیہی روزگار اسکیم کے زمینی نفاذ میں اہم کردار ادا کرتا ہے۔ تاہم، ان کی خدمات صرف کنٹریکٹ کی مدت یا اسکیم کے اختتام تک ہی مؤثر رہتی ہیں۔
جواب میں واضح کیا گیا کہ ’’تاحال منریگا کے تحت تعینات عملے کی خدمات کو مستقل کرنے کے بارے میں کوئی تجویز موجود نہیں ہے۔‘‘
البتہ حکومت نے یہ بھی بتایا کہ منریگا سپورٹ اسٹاف کے اعزازیہ میں وقتاً فوقتاً اضافہ کیا گیا ہے، جس کی تازہ مثال گورنمنٹ آرڈر نمبر 49-RD&PR آف 2024 (مورخہ 30 جنوری 2024) ہے۔
نظرثانی شدہ ماہانہ اعزازیہ:
گرام روزگار سہایک (GRS): 6,806 روپے سے بڑھا کر 10,209 روپے
ٹیکنیکل اسسٹنٹ: 11,000 روپے سے بڑھا کر 16,500 روپے
ایم آئی ایس آپریٹر: 11,000 روپے سے بڑھا کر 13,200 روپے
ایڈمن/اکاؤنٹس اسسٹنٹ: 6,806 روپے سے بڑھا کر 10,209 روپے
حکومت نے مزید کہا کہ آئندہ اعزازیہ میں کسی بھی اضافے پر ریاستی ایمپلائمنٹ گارنٹی کونسل کی آئندہ میٹنگوں میں غور کیا جائے گا۔ (کے این او)
