امت نیوز ڈیسک //
ڈوڈہ، 10 فروری:جموں و کشمیر کے ضلع ڈوڈہ میں پولیس نے قومی پرچم کی مبینہ بے حرمتی کے الزام میں ایک شخص کو حراست میں لے لیا ہے۔ پولیس کے مطابق اس واقعے کی ویڈیو سوشل میڈیا پر وائرل ہونے کے بعد کارروائی عمل میں لائی گئی۔
کشمیر نیوز کارنر سے بات کرتے ہوئے ایک پولیس عہدیدار نے بتایا کہ وائرل ویڈیو میں نظر آنے والے شخص کی شناخت فاروق احمد کے طور پر ہوئی ہے، جو ڈوڈہ کے علاقے ناگری کا رہائشی ہے۔ ویڈیو میں مبینہ طور پر دیکھا گیا کہ وہ بھارتی قومی پرچم کو اپنے گھر کی کھڑکی کے شیشے صاف کرنے کے لیے استعمال کر رہا ہے۔
پولیس کے مطابق یہ عمل بادی النظر میں قومی وقار کی توہین کی روک تھام کے قانون 1971 کے تحت قابلِ تعزیر جرم بنتا ہے۔
سینئر سپرنٹنڈنٹ آف پولیس ڈوڈہ کی ہدایت پر ڈوڈہ پولیس اسٹیشن میں ایف آئی آر نمبر 30/2026 درج کی گئی، جبکہ ملزم کو تفتیش کے لیے حراست میں لے لیا گیا ہے۔
پولیس کا کہنا ہے کہ معاملے کی مزید تفتیش جاری ہے اور قانون کے مطابق سخت کارروائی عمل میں لائی جائے گی۔
پولیس نے عوام سے اپیل کی ہے کہ قومی علامات کا احترام کریں اور اس نوعیت کے کسی بھی واقعے کی فوری اطلاع متعلقہ حکام کو دیں۔(کے این سی)
