امت نیوز ڈیسک //
جموں، 23 فروری : ضلع جموں کے اکھنور سیکٹر میں پیر کے روز پاکستانی نشانات والے دو غبارے برآمد ہونے کے بعد پولیس نے معاملے کی تحقیقات شروع کر دی ہیں۔
سرکاری ذرائع کے مطابق یہ غبارے گاؤں گنارا، نیلی نالہ کے قریب ایک کھلے علاقے سے برآمد ہوئے جو کہ کھور پولیس اسٹیشن کے دائرہ اختیار میں آتا ہے۔ بتایا جاتا ہے کہ غباروں پر ایک پاکستانی موبائل نمبر درج تھا جبکہ ایک اسکینر کوڈ جیسی تصویر بھی چھپی ہوئی تھی۔
موقع سے پاکستانی اور امریکی کرنسی کے چند نوٹ بھی برآمد کیے گئے ہیں، جنہیں پولیس نے اپنی تحویل میں لے لیا ہے۔ اطلاع ملتے ہی پولیس ٹیمیں جائے وقوعہ پر پہنچ گئیں اور تمام مواد کو ضبط کرکے جانچ کے لیے بھیج دیا گیا۔
حکام کا کہنا ہے کہ غباروں کی اصل اور ان پر درج رابطہ تفصیلات اور غیر ملکی کرنسی کے مقصد کی جانچ کی جا رہی ہے۔ سکیورٹی ایجنسیاں اس بات کا بھی جائزہ لے رہی ہیں کہ آیا اس واقعے کا کوئی سرحد پار تعلق ہے یا یہ ماضی میں سرحدی علاقوں میں پیش آنے والے اسی نوعیت کے واقعات کا تسلسل ہے۔
ابتدائی جانچ اور تکنیکی تجزیے کے بعد مزید تفصیلات سامنے آنے کی توقع ہے۔
