امت نیوز ڈیسک //
سری نگر، 31 مارچ: ڈائریکٹوریٹ آف اسکول ایجوکیشن کشمیر نے پیر کے روز ایک حکم نامہ جاری کرتے ہوئے وادی بھر کے تمام سرکاری اور تسلیم شدہ نجی اسکولوں کے اوقات کار میں تبدیلی کا اعلان کیا ہے۔ نئے اوقات کار یکم اپریل سے نافذ العمل ہوں گے۔
سرکاری حکم نامے کے مطابق سری نگر میونسپل حدود کے اندر واقع اسکول اب صبح 9:00 بجے سے دوپہر 3:00 بجے تک کھلے رہیں گے۔ جبکہ سری نگر میونسپل حدود سے باہر اور کشمیر ڈویژن کے دیگر اضلاع میں قائم تعلیمی اداروں کے اوقات صبح 9:30 بجے سے دوپہر 3:30 بجے تک مقرر کیے گئے ہیں۔
حکم نامہ میں تمام متعلقہ حکام اور اسکول سربراہان کو ہدایت دی گئی ہے کہ وہ نئے اوقات کار پر سختی سے عمل درآمد کو یقینی بنائیں اور کسی بھی قسم کی خلاف ورزی برداشت نہیں کی جائے گی۔
حکام کے مطابق اسکولوں کے اوقات کار میں یہ تبدیلی نئے تعلیمی سیشن سے قبل تعلیمی نظام کو منظم اور یکساں بنانے کے مقصد سے کی گئی ہے۔
