امت نیوز ڈیسک //
سری نگر، 30 مارچ:جموں و کشمیر قانون ساز اسمبلی نے پیر کے روز پلوامہ میں شیخ العالم یونیورسٹی کے قیام سے متعلق نجی رکن بل کو مسترد کر دیا۔ یہ بل پی ڈی پی کے رکن اسمبلی وحید پرا کی جانب سے پیش کیا گیا تھا۔
بل میں جنوبی کشمیر کے ضلع پلوامہ میں ایک رہائشی اور تکنیکی نجی یونیورسٹی قائم کرنے کی تجویز دی گئی تھی، جہاں مختلف شعبوں میں اعلیٰ تعلیم فراہم کی جانی تھی۔ منصوبے کے لیے مالی وسائل کشمیر ایجوکیشنل فاؤنڈیشن کے اضافی فنڈز سے حاصل کرنے کی بات کی گئی تھی۔
تاہم حکومت نے وزیر تعلیم سکینہ ایتو کی قیادت میں پالیسی اور طریقۂ کار سے متعلق اعتراضات اٹھاتے ہوئے اس بل کی مخالفت کی۔ ایوان میں حکمران جماعت کے اراکین نے بھی بل کی مخالفت کی، جس کے بعد ووٹنگ میں اسے مسترد کر دیا گیا۔
