امت نیوز ڈیسک //
اسلام آباد:ایران کے بعد امریکہ کا اعلیٰ سطحی وفد بھی اہم مذاکرات میں شرکت کے لیے اسلام آباد پہنچ گیا ہے۔ امریکی وفد کی قیادت جے ڈی وینس کر رہے ہیں، جو دونوں ممالک کے درمیان جاری مذاکرات میں حصہ لیں گے۔
اسلام آباد ایئرپورٹ پر امریکی وفد کا استقبال نائب وزیراعظم و وزیر خارجہ اسحاق ڈار، وزیر داخلہ محسن نقوی، پاک فوج کے سربراہ عاصم منیر اور آئی ایس آئی کے سربراہ لیفٹیننٹ جنرل عاصم ملک نے کیا۔
پاکستانی وزارتِ خارجہ کے مطابق اس وفد میں خصوصی ایلچی اسٹیو وٹکوف اور جیرڈ کشنر بھی شامل ہیں، جو مذاکراتی عمل میں اہم کردار ادا کریں گے۔
اس موقع پر اسحاق ڈار نے امریکی نائب صدر کا خیرمقدم کرتے ہوئے کہا کہ پاکستان خطے میں امن و استحکام کے لیے امریکہ کے کردار کو سراہتا ہے۔ انہوں نے امید ظاہر کی کہ تمام فریقین تعمیری انداز میں مذاکرات کریں گے۔
اعلامیے کے مطابق پاکستان نے ایک بار پھر اس عزم کا اعادہ کیا ہے کہ وہ امریکہ اور ایران کے درمیان تنازع کے پرامن اور دیرپا حل کے لیے سہولت کاری جاری رکھے گا۔
