امت نیوز ڈیسک //
جموں، 17 اپریل: جموں و کشمیر انتظامیہ نے ضلع جموں میں سوشل میڈیا پر فرقہ وارانہ اور اشتعال انگیز مواد کی تشہیر و ترسیل پر 60 دن کے لیے مکمل پابندی عائد کر دی ہے، جس کا مقصد عوامی امن اور ہم آہنگی کو برقرار رکھنا ہے۔
ضلعی مجسٹریٹ ڈاکٹر راکیش کی جانب سے جاری حکم نامے کے مطابق سوشل میڈیا پلیٹ فارمز کا بڑھتا ہوا غلط استعمال تشویشناک ہے، جہاں اشتعال انگیز، جھوٹی اور نفرت انگیز مواد شیئر کیا جا رہا ہے، جو امن عامہ کو متاثر کر سکتا ہے اور فرقہ وارانہ کشیدگی کو ہوا دے سکتا ہے۔
یہ حکم بی این ایس ایس کی دفعہ 163 کے تحت جاری کیا گیا ہے، جس کے تحت کسی بھی ایسے مواد کی پوسٹنگ، اپ لوڈنگ، شیئرنگ یا فارورڈنگ پر پابندی ہوگی جو مذہب، نسل، ذات، زبان یا علاقہ کی بنیاد پر نفرت یا دشمنی کو فروغ دے۔
حکم کے مطابق یہ پابندی فوری طور پر نافذ العمل ہوگی اور ضلع جموں کے تمام علاقوں پر لاگو رہے گی۔
انتظامیہ نے خبردار کیا ہے کہ حکم کی خلاف ورزی کرنے والوں کے خلاف سخت قانونی کارروائی عمل میں لائی جائے گی۔
