امت نیوز ڈیسک //
سری نگر، 27 جون: سابق مرکزی وزیر اور سینئر سیاست دان کرن سنگھ نے ہفتہ کے روز کہا کہ جموں و کشمیر کی ریاستی حیثیت جلد از جلد بحال کی جانی چاہیے، کیونکہ مرکزی حکومت پہلے ہی اس کا وعدہ کر چکی ہے۔
سری نگر میں ایک تقریب کے موقع پر صحافیوں سے گفتگو کرتے ہوئے کرن سنگھ نے کہا کہ 2019 میں جموں و کشمیر کی تنظیمِ نو کے بعد اسے دو مرکز کے زیر انتظام علاقوں میں تقسیم کیا گیا تھا، تاہم اب ریاستی درجہ بحال کرنے کا وقت آ گیا ہے۔
انہوں نے کہا، "میرا ماننا ہے کہ جموں و کشمیر کو دوبارہ ریاست کا درجہ ملنا چاہیے۔ حکومت بھی یہ کہہ چکی ہے کہ وہ ریاستی حیثیت بحال کرے گی۔”
کرن سنگھ نے کہا کہ جموں و کشمیر کبھی ملک کی بڑی ریاستوں میں شمار ہوتا تھا، اس لیے اسے اپنا جائز حق واپس ملنا چاہیے۔
بین المذاہب ہم آہنگی پر زور دیتے ہوئے انہوں نے کہا کہ مختلف مذاہب کے ماننے والوں کے درمیان مکالمہ اور باہمی احترام ملک کے اتحاد اور کشمیر کے پائیدار امن کے لیے بے حد ضروری ہے۔
انہوں نے بتایا کہ ان کی صاحبزادی نے ماضی میں سری نگر میں دارا شیکو کے افکار کو فروغ دینے کے لیے ایک مرکز قائم کیا تھا، اور امید ظاہر کی کہ عوامی تعاون سے مستقبل میں ایسا مرکز دوبارہ قائم کیا جا سکے گا۔
اپنے پیغام میں کرن سنگھ نے جموں و کشمیر کے عوام سے بھائی چارے، مذہبی رواداری اور باہمی تعاون کو فروغ دینے کی اپیل کرتے ہوئے کہا کہ یہی خطے کی ترقی اور ملک کے اتحاد کی ضمانت ہے۔
