امت نیوز ڈیسک//
بڈگام، یکم جولائی : وسطی کشمیر کے ضلع بڈگام میں بدھ کے روز ایک ٹاٹا مسافر بس حادثے کا شکار ہو گئی، جس کے نتیجے میں ڈرائیور سمیت 25 افراد زخمی ہو گئے۔
اطلاعات کے مطابق یہ بس بیروہ سے بڈگام جا رہی تھی کہ نصراللہ پورہ کے قریب کونر علاقے میں حادثے کا شکار ہو گئی۔ حادثے کی وجوہات فوری طور پر معلوم نہیں ہو سکیں۔
حادثے کی اطلاع ملتے ہی نصراللہ پورہ کے مقامی لوگ جائے وقوعہ پر پہنچ گئے اور سرکاری امدادی ٹیموں کے آنے سے پہلے ہی زخمیوں کو بس سے نکال کر بچاؤ کارروائی شروع کر دی۔
تمام زخمیوں کو علاج کے لیے سب ڈسٹرکٹ ہسپتال بڈگام منتقل کیا گیا، جہاں ان کا علاج جاری ہے۔ زخمیوں کی حالت کے بارے میں فوری طور پر کوئی تفصیلات سامنے نہیں آئی ہیں۔
پولیس نے واقعے کا نوٹس لیتے ہوئے مقدمہ درج کر لیا ہے اور حادثے کی وجوہات جاننے کے لیے تحقیقات شروع کر دی ہیں۔
