امت نیوز ڈیسک //
سرینگر، 4 جولائی: جموں و کشمیر کے وزیرِ اعلیٰ عمر عبداللہ نے سرینگر ایئرپورٹ کو عارضی طور پر بند کرنے کے مجوزہ منصوبے کو واپس لینے پر مرکزی حکومت کا شکریہ ادا کیا ہے۔
وزیرِ اعلیٰ نے سوشل میڈیا پلیٹ فارم ایکس پر اپنے پیغام میں مرکزی وزیرِ دفاع راجناتھ سنگھ اور مرکزی وزیرِ شہری ہوا بازی رام موہن نائیڈو کا خصوصی طور پر شکریہ ادا کرتے ہوئے کہا کہ انہوں نے جموں و کشمیر حکومت کی درخواست کو قبول کرتے ہوئے ایئرپورٹ بند کرنے کے فیصلے کو معطل کر دیا۔
عمر عبداللہ نے کہا کہ مجوزہ بندش سے عام مسافروں کو شدید مشکلات کا سامنا کرنا پڑتا، جبکہ متعدد سیاحتی گروپس اور سیاحوں کو بھی کشمیر کے اپنے طے شدہ دورے منسوخ کرنے پڑے تھے۔
انہوں نے کہا کہ حکومت کے اس فیصلے سے نہ صرف مسافروں کو بڑی راحت ملے گی بلکہ وادی کی سیاحت سے وابستہ شعبے کو بھی فائدہ پہنچے گا۔
