امت نیوز ڈیسک //
جموں، 7 جولائی: بھارتیہ جنتا پارٹی (بی جے پی) کے صدر نتن نبین نے کہا ہے کہ آرٹیکل 370 کی منسوخی کے بعد جموں و کشمیر میں نمایاں تبدیلی آئی ہے اور اب یہ خطہ تنازعات کے بجائے ترقی، امن اور اپنی بھرپور ثقافتی شناخت کے حوالے سے جانا جاتا ہے۔
جموں میں صحافیوں سے گفتگو کرتے ہوئے انہوں نے کہا کہ آرٹیکل 370 کی منسوخی عوام کی زندگی میں تبدیلی کا اہم سبب بنی ہے۔ ان کا کہنا تھا کہ وزیر اعظم نریندر مودی کی قیادت میں مرکزی حکومت نے جموں و کشمیر کی ثقافت، سیاحت، نوجوانوں اور خواتین کو بااختیار بنانے کے لیے متعدد اقدامات کیے ہیں، جن کے مثبت نتائج سامنے آ رہے ہیں۔
نتن نبین نے کہا کہ بی جے پی جموں و کشمیر میں ایک ذمہ دار اپوزیشن کے طور پر عوامی مسائل کو بھرپور انداز میں اٹھاتی رہے گی اور مرکز میں اپنی حکومت کے ذریعے خطے کی ترقی، خوشحالی اور ثقافتی ورثے کے تحفظ کے لیے کام جاری رکھے گی۔
