امت نیوز ڈیسک//
سوپور، 11 اپریل: شمالی کشمیر کے بارہمولہ ضلع کے سوپور قصبے کے مہاراج پورہ علاقے کے مکینوں نے منگل کو اپنے علاقے میں بنیادی سہولیات کی کمی کے خلاف ایک احتجاجی مظاہرہ کیا۔
سوپور پولیس سٹیشن کے سامنے سینکڑوں مرد و خواتین جمع ہوئے اور سوپور-بانڈی پورہ روڈ کو گھنٹوں تک بلاک کیا۔ تاہم بعد میں پولیس کی مداخلت کے بعد ٹریفک بحال کر دی گئی۔
خبر رساں ایجنسی سے گفتگو کرتے ہوئے مظاہرین کا کہنا تھا کہ علاقے میں پینے کے پانی کی قلت، نکاسی آب کی ناقص سہولت اور سڑکوں کی خستہ حالی ہے۔
انہوں نے کہا، "مسلسل حکومتوں کی طرف سے علاقے کو نظر انداز کیا گیا ہے اور کوئی بھی ہمارے مسائل کو سنجیدگی سے نہیں لے رہا ہے”۔
انہوں نے الزام لگایا کہ انہیں ان نام نہاد لیڈروں نے نشانہ بنایا اور بیوقوف بنایا جو صرف انتخابات کے دوران ان کے پاس آئے تھے۔
دریں اثنا، مکینوں نے ایل جی انتظامیہ اور متعلقہ حکام پر زور دیا کہ وہ ان کے حقیقی مطالبات پر غور کریں تاکہ وہ راحت کی سانس لے سکیں۔
