امت نیوز ڈیسک //
سرینگر، 28 جنوری: جموں و کشمیر حکومت نے طلبہ میں ذہنی صحت کے تحفظ اور خودکشیوں کی روک تھام کے لیے تمام اضلاع میں ضلعی سطح کی مانیٹرنگ کمیٹیاں قائم کر دی ہیں۔
جنرل ایڈمنسٹریشن ڈیپارٹمنٹ کی جانب سے جاری ایک سرکاری حکم نامے کے مطابق، ان کمیٹیوں کی سربراہی ضلع ترقیاتی کمشنر کریں گے۔
کمیٹی کے دیگر اراکین میں چیف ایجوکیشن آفیسر، چیف میڈیکل آفیسر، ڈسٹرکٹ سوشل ویلفیئر آفیسر اور سول سوسائٹی کا ایک نمائندہ شامل ہوگا۔
حکم نامے میں کہا گیا ہے کہ یہ کمیٹیاں تعلیمی اداروں میں طلبہ کی ذہنی صحت کی نگرانی کریں گی اور خودکشی جیسے واقعات کی روک تھام کے لیے مؤثر اقدامات کو یقینی بنائیں گی۔ اس کے علاوہ، کمیٹیاں متعلقہ محکموں کے درمیان بہتر تال میل قائم کرنے اور بروقت مداخلت کے ذریعے خطرے سے دوچار طلبہ کی مدد پر توجہ دیں گی۔
حکومت کے مطابق، یہ اقدام بڑھتے ہوئے ذہنی دباؤ اور طلبہ کو درپیش نفسیاتی مسائل کے پیش نظر اٹھایا گیا ہے، تاکہ تعلیمی ماحول کو محفوظ اور معاون بنایا جا سکے۔
