امت نیوز ڈیسک //
اننت ناگ : ضلع اننت ناگ کے اہلن گڈول علاقہ میں پانچویں روز بھی سکیورٹی فورسز کی جانب سے سرچ آپریشن جاری ہے۔ علاقہ میں 10 اگست کو سرچ آپریشن کے دوران جنگل میں چھپے بیٹھے عسکریت پسندوں نے اچانک سکیورٹی فورسز پر فائرنگ کردی تھی جس میں فوج کے تین جوان سمیت دو عام شہری زخمی ہو گئے تھے۔ تاہم بعد میں علاج و معالجہ کے دوران دو فوجی جوان اور ایک عام شہری زخموں کی تاب نہ لاتے ہوئے دم توڑ دیا۔ ہلاک ہونے والے فوجی جوانوں کی شناخت حوالدار دیپک کمار یادو اور لانس نائک پراوین شرما کے طور پر ہوئی ہے۔
10 اگست کو سرچ آپریشن کے ابتدائی مرحلہ میں گھنے جنگل میں چھپے بیٹھے عسکریت پسندوں نے سکیورٹی فورسز کی سرچنگ پارٹی پر اچانک فائرنگ کی تھی، کچھ دیر تک دونوں طرف سے فائرنگ کا سلسلہ جاری رہا تاہم بعد میں فائرنگ کا سلسلہ تھم گیا تھا اور عسکریت پسند گھنے جنگل میں فرار ہوگئے۔ اگرچہ سرچ آپریشن گزشتہ چار روز سے جاری ہے تاہم ابھی تک سکیورٹی فورسز اور عسکریت پسندوں کے درمیاں پھر سے آمنا سامنا نہیں ہوا۔
اہلن گڈول کے جنگلاتی علاقہ میں عسکریت پسندوں کو ڈھونڈ نکالنے کے لئے فوج کی مزید نفری بلائی گئی ہے، عسکریت پسندوں کی نقل و حمل کا مشاہدہ کرنے کے کئے جدید آلات کا استعمال کیا جا رہا اور وسیع تر جنگلاتی علاقہ میں بڑے پیمانے پر سرچ آپریشن جاری ہے۔ اس آپریشن میں فوج کے 19 راشٹریہ رائفلز، سی آر پی ایف اور جموں کشمیر پولیس مشترکہ طور کام کر رہے ہیں۔ آئی جی پی کشمیر نے ایک بیان میں کہا کہ اہلن گڈول کے جنگلات میں تین سے چار عسکریت پسند موجود ہیں۔ انہوں نے کہا کہ انکاؤنٹر کے دوران جو عام شہری زد میں آگئے تھے، اس کی جانچ چل رہی ہے اور پتہ لگایا جا رہا یے کہ اس جگہ پر عام شہری کیا کر رہے تھے۔
واضح رہے کہ مذکورہ علاقہ میں گزشتہ برس 13 ستمبر کو عسکریت پسندوں اور سکیورٹی فورسز کے درمیاں سات روزہ تک مسلح جھڑپ جاری رہی تھی ،جس میں فوج کے، کمانڈنگ افسر، میجر اور ڈی ایس پی ہمایوں بھٹ سمیت پانچ سکیورٹی اہلکار ہلاک ہو گئے تھے ،جبکہ دو مقامی عسکریت کو بھی ہلاک کیا گیا تھا۔
