امت نیوز ڈیسک //
اننت ناگ: جموں و کشمیر کے اننت ناگ میں ٹیریٹوریل آرمی کا ایک سپاہی لاپتہ ہوگیا تھا جسے پولیس نے بازیاب کرلیا۔ حکام نے بتایا کہ جنوبی کشمیر کے اننت ناگ ضلع کے اچھہ بل علاقے میں اتوار کی شام لاپتہ ہونے والے ٹیریٹوریل فوج (ٹی اے) کے ایک جوان کا جموں و کشمیر پولیس نے سراغ لگا لیا ہے۔ ٹیریٹوریل آرمی (ٹی اے) کا سپاہی عابد حسین بھٹ ولد عبدالغنی بھٹ ساکنہ جنوبی کشمیر کے ضلع اننت ناگ کے کھرپورہ چترگل علاقے کے 162 ٹی اے یونٹ سے تعلق رکھتا ہے
وہ ایک ماہ کی چھٹی پر تھا اور ڈیوٹی پر واپس جانے والا تھا لیکن اچانک لاپتہ ہوگیا تھا ،جس کے بعد سکیورٹی فورسز نے اسے بڑے پیمانے پر تلاش کرنے کی کاروائی شروع کی تھی۔ ایک پولیس افسر نے بتایا کہ فوجی اب مل گیا ہے اور ابھی تک اس معاملے میں عسکریت پسندی کا کوئی پہلو سامنے نہیں ہے۔ اس حوالے سے تحقیقات شروع کر دی گئی ہیں۔
قبل ازیں تفصیلات میں بتایا گیا تھا کہ جموں و کشمیر کے اننت ناگ میں ٹیریٹوریل آرمی کا ایک سپاہی جنوبی کشمیر میں ضلع اننت ناگ کے اچابل علاقے میں اتوار کی شام لاپتہ ہوگیا۔ ایک اہلکار نے بتایا تھا کہ ٹیریٹوریل آرمی کا سپاہی عابد حسین بھٹ ولد عبدالغنی بھٹ ساکنہ 162 ٹی اے یونٹ کے کھرپورہ چترگل ایک ماہ کی چھٹی پر تھا اور اسے ڈیوٹی پر واپس آنا تھا لیکن اسی دن لاپتہ ہو گیا۔
واضح رہے کہ 9 اکتوبر، 2024 کو، اننت ناگ میں عسکریت پسندو کے ذریعہ اغوا کیے گئے ٹیریٹوریل آرمی (TA) کے سپاہی کی گولیوں سے چھلنی لاش سیکورٹی فورسز کو ملی تھی۔ یہ واقعہ کشمیر میں فوجیوں کے اغوا کے سلسلے کا تازہ ترین واقعہ ہے۔ اس سے قبل اگست 2023 میں ایک فوجی کولگام ضلع میں اپنے گھر سے چھٹی کے دوران لاپتہ ہو گیا تھا لیکن بعد میں پولیس نے اسے ڈھونڈ نکالا۔
