امت نیوز ڈیسک //
جموں، 27 مارچ :جموں و کشمیر کی قانون ساز اسمبلی کے جاری بجٹ اجلاس کے دوران جمعہ کے روز حکمران جماعت نیشنل کانفرنس (این سی) کے اراکین نے ایران پر امریکہ اور اسرائیل کے مبینہ حملوں کے خلاف ایوان کے اندر احتجاج کیا۔
اراکین اسمبلی نے نعرے بازی کرتے ہوئے ان حملوں کو بین الاقوامی قوانین کی خلاف ورزی اور کھلی جارحیت قرار دیا۔ احتجاج کے دوران انہوں نے پلے کارڈز بھی اٹھا رکھے تھے اور کچھ دیر کے لیے ایوان کی کارروائی متاثر رہی۔
نیشنل کانفرنس کے اراکین کا کہنا تھا کہ ایران کے خلاف ہونے والی حالیہ کارروائیوں نے خطے میں عوامی جذبات کو شدید ٹھیس پہنچائی ہے، اس لیے اس معاملے کو ایوان میں باضابطہ طور پر زیر بحث لایا جانا چاہیے۔
بعد ازاں اسمبلی کی کارروائی دوبارہ شروع کر دی گئی، تاہم اراکین نے مطالبہ کیا کہ حکومت اس مسئلے پر واضح مؤقف اختیار کرے۔
