امت نیوز ڈیسک //
سرینگر، 26 مارچ : جموں و کشمیر کے وزیر اعلیٰ عمر عبداللہ نے عوام سے اپیل کی ہے کہ وہ افواہوں پر کان نہ دھریں اور پیٹرول پمپوں پر غیر ضروری رش سے گریز کریں، بصورت دیگر حکومت کو صورتحال پر قابو پانے کے لیے عارضی طور پر پیٹرول پمپ بند کرنے کا فیصلہ کرنا پڑ سکتا ہے۔
انہوں نے کہا کہ اس وقت ایندھن کی کوئی قلت نہیں ہے اور ریاست بھر میں پیٹرول اور ڈیزل کی سپلائی معمول کے مطابق جاری ہے۔ عوام کو طویل قطاریں بنانے اور ذخیرہ اندوزی سے بچنے کی ہدایت دیتے ہوئے انہوں نے کہا کہ غلط اطلاعات اور افواہیں ہی اس غیر ضروری رش کی بڑی وجہ بن رہی ہیں۔
وزیر اعلیٰ نے یقین دہانی کرائی کہ حکومت صورتحال پر مسلسل نظر رکھے ہوئے ہے اور اگر رش اسی طرح جاری رہا تو نظم و نسق برقرار رکھنے کے لیے عارضی اقدامات اٹھانے پڑ سکتے ہیں۔
عمر عبداللہ نے بتایا کہ وزیر اعظم نریندر مودی کی زیر صدارت ایک اہم اجلاس بھی طلب کیا گیا ہے جس میں ایران اور خطے کی موجودہ صورتحال کا جائزہ لیا جائے گا اور ضروری اشیاء کی بلا تعطل فراہمی یقینی بنانے کے اقدامات پر غور کیا جائے گا۔
انہوں نے عوام سے ایک بار پھر اپیل کی کہ وہ سرکاری اطلاعات پر اعتماد کریں اور غیر مصدقہ خبروں سے متاثر ہو کر پیٹرول پمپوں کا رخ نہ کریں۔
