امت نیوز ڈیسک //
جموں و کشمیر کے ضلع اُدھم پور میں ایک افسوسناک سڑک حادثے میں کم از کم 15 افراد جاں بحق جبکہ متعدد زخمی ہو گئے ہیں، جن میں کئی کی حالت تشویشناک بتائی جا رہی ہے۔ حادثہ پیر کی صبح رام نگر علاقے میں پیش آیا، جہاں ایک مسافر بس بے قابو ہو کر گہری کھائی میں جا گری۔
اس دلخراش واقعے پر ملک کی اعلیٰ قیادت نے گہرے رنج و غم کا اظہار کیا ہے۔ صدرِ جمہوریہ دروپدی مرمو نے اپنے پیغام میں کہا کہ قیمتی جانوں کے ضیاع پر انہیں شدید صدمہ پہنچا ہے، اور انہوں نے متاثرہ خاندانوں سے تعزیت اور زخمیوں کی جلد صحت یابی کی دعا کی۔
وزیراعظم نے بھی حادثے پر افسوس کا اظہار کرتے ہوئے وزیراعظم ریلیف فنڈ سے معاوضے کا اعلان کیا۔ انہوں نے جاں بحق افراد کے اہل خانہ کے لیے 2 لاکھ روپے اور زخمیوں کے لیے 50 ہزار روپے امداد دینے کا اعلان کیا۔
جموں و کشمیر کے لیفٹیننٹ گورنر نے حادثے کو نہایت افسوسناک قرار دیتے ہوئے متعلقہ حکام کو فوری امدادی کارروائیاں تیز کرنے کی ہدایت دی۔ وزیر اعلیٰ نے بھی متاثرہ خاندانوں سے ہمدردی کا اظہار کرتے ہوئے یقین دہانی کرائی کہ حکومت ہر ممکن مدد فراہم کرے گی۔
سابق وزیر اعلیٰ محبوبہ مفتی اور کانگریس رہنما پرینکا گاندھی نے بھی اس سانحے پر گہرے دکھ اور افسوس کا اظہار کیا۔
ریسکیو آپریشن تاحال جاری ہے۔ پولیس اور ریسکیو ٹیمیں موقع پر موجود ہیں اور زخمیوں کو قریبی اسپتالوں میں منتقل کیا جا رہا ہے۔ حکام کے مطابق ہلاکتوں میں اضافے کا خدشہ موجود ہے کیونکہ بعض زخمیوں کی حالت نازک ہے۔
