امت نیوز ڈیسک //
سرینگر، 23 اپریل :جموں و کشمیر پولیس نے جمعرات کو سرینگر کے حضرت بل علاقے میں ایک خاتون سمیت چار اوور گراؤنڈ ورکرز کو گرفتار کر لیا، جو مبینہ طور پر ملی ٹینٹس کو لاجسٹک سپورٹ فراہم کر رہے تھے۔
حکام کے مطابق یہ گرفتاریاں بدھ کی رات ایک خصوصی آپریشن کے دوران عمل میں لائی گئیں۔ گرفتار افراد کی شناخت ظہور احمد میر، بشیر احمد بھٹ، غلام محمد بھٹ، اور ایک خاتون شازیہ محمد کے طور پر ہوئی ہے، جو سبھی حضرت بل کے رہائشی ہیں۔
پولیس کا کہنا ہے کہ ملزمان کے قبضے سے قابلِ اعتراض مواد برآمد کیا گیا ہے، جس میں ایک ہینڈ گرینیڈ، اے کے-47 کی 15 گولیاں، چار موبائل فونز اور نقد رقم شامل ہے۔
حکام نے مزید بتایا کہ ملزمان کے خلاف غیر قانونی سرگرمیوں کی روک تھام کے قانون اور آرمز ایکٹ کے تحت مقدمہ درج کر لیا گیا ہے، جبکہ مزید تفتیش جاری ہے۔
