امت نیوز ڈیسک //
رام بن، 30 مئی: جموں سے سری نگر جا رہا چونا پتھر سے لدا ایک ٹرک ہفتہ کی صبح رام بن کے گنگرو علاقے کے قریب حادثے کا شکار ہو کر گہرے نالے میں جا گرا اور بعد ازاں آگ بھڑک اٹھی، جس کے نتیجے میں دو افراد کی موت ہوگئی۔
حکام کے مطابق رجسٹریشن نمبر JK19A-0693 والا ٹرک جموں سے سری نگر کی جانب رواں تھا کہ گنگرو کے قریب ڈرائیور کا گاڑی پر قابو ختم ہوگیا، جس کے باعث ٹرک سڑک سے پھسل کر ملحقہ نالے میں جا گرا اور آگ لگ گئی۔
حادثے کی اطلاع ملتے ہی فائر اینڈ ایمرجنسی سروسز کے اہلکار موقع پر پہنچ گئے اور امدادی و بچاؤ کارروائیاں شروع کیں۔ حکام نے بتایا کہ اب تک جائے حادثہ سے دو لاشیں برآمد کی جا چکی ہیں۔
آخری اطلاعات موصول ہونے تک ریسکیو آپریشن جاری تھا جبکہ حادثے کی وجوہات جاننے کے لیے تحقیقات شروع کر دی گئی ہیں۔
