امت نیوز ڈیسک //
سونمرگ، 18 جون: پیپلز ڈیموکریٹک پارٹی (پی ڈی پی) کی صدر محبوبہ مفتی نے کہا ہے کہ امرناتھ یاترا کشمیر کے عوام کے لیے ایک بہترین موقع ہے کہ وہ ملک بھر سے آنے والے لوگوں کے ساتھ روابط مضبوط کریں اور اپنی مہمان نوازی، محبت اور ہمدردی کے ذریعے تعصب اور بداعتمادی کا خاتمہ کریں۔
محبوبہ مفتی نے کہا کہ کشمیر آنے والا ہر یاتری یہاں سے وادی کی تہذیب، اقدار، مذہبی رواداری اور عوام کے بارے میں بہتر اور مثبت تاثر لے کر واپس جانا چاہیے۔
انہوں نے کہا کہ امرناتھ یاترا صرف ایک مذہبی سفر نہیں بلکہ مختلف برادریوں اور ثقافتوں کے درمیان باہمی احترام، بھائی چارے اور ہم آہنگی کو فروغ دینے کا بھی ایک موقع ہے۔
محبوبہ مفتی نے کہا، "یہ ہمارا موقع ہے کہ ہم اسلام اور کشمیر کی حقیقی روح کو دنیا کے سامنے پیش کریں۔” انہوں نے زور دیا کہ کشمیری عوام اپنی روایتی مہمان نوازی اور انسان دوستی کے ذریعے محبت، امن اور یکجہتی کا پیغام عام کریں۔
