امت نیوز ڈیسک //
اونتی پورہ: سرینگر کے رکنِ پارلیمان آغا روح اللہ مہدی نے آج ٹاؤن ہال اونتی پورہ میں ایک عوامی دربار کی صدارت کی، جس میں مختلف محکموں کے ضلعی اور سب ضلعی افسران نے شرکت کی۔ اس موقع پر عوام نے اپنے مسائل اور مطالبات پیش کیے جنہیں رکنِ پارلیمان نے غور سے سنا اور ترجیحی بنیادوں پر ان کے حل کی یقین دہانی کرائی۔
بعد ازاں میڈیا سے گفتگو کرتے ہوئے آغا روح اللہ نے کہا کہ عوام کا فیصلہ ہی سب سے اہم اور قابلِ احترام ہوتا ہے۔ انہوں نے کہا کہ اگر عوام موجودہ صورتحال سے مطمئن ہیں تو اسے قبول کیا جانا چاہیے، لیکن اگر عوام مطمئن نہیں ہیں تو تمام متعلقہ سیاسی اور انتظامی اداروں کو اپنی کارکردگی کا جائزہ لینا ہوگا۔
انہوں نے کہا کہ گزشتہ دو برسوں کے دوران زمینی صورتحال نے واضح کر دیا ہے کہ جن لوگوں سے عوام کو امیدیں وابستہ تھیں، وہ نہ سیاسی سطح پر مؤثر جدوجہد کر رہے ہیں اور نہ ہی انتظامی سطح پر عوامی مسائل کے حل میں کامیاب نظر آتے ہیں۔
یوسف پٹھان سے متعلق ایک سوال کے جواب میں آغا روح اللہ نے کہا کہ ان کا سوال براہِ راست یوسف پٹھان سے تھا۔ انہوں نے کہا کہ جب یوسف پٹھان کو مبینہ طور پر دھمکیاں دی گئیں تو ان کی جماعت کے رہنماؤں نے ان کی بھرپور حوصلہ افزائی کی اور ان کے ساتھ کھڑے ہونے کا یقین دلایا۔ آغا روح اللہ نے کہا کہ عوام اپنے نمائندوں کو اس امید کے ساتھ منتخب کرتے ہیں کہ وہ دباؤ کے سامنے جھکنے کے بجائے عوامی حقوق اور اپنے اصولی مؤقف کا دفاع کریں گے۔
انہوں نے مزید کہا کہ جمہوری نظام میں عوامی مینڈیٹ کی پاسداری ضروری ہے اور منتخب نمائندوں کو عوام کی امنگوں اور اعتماد کے مطابق کردار ادا کرنا چاہیے۔
