امت نیوز ڈیسک //
سری نگر، 23 جون: پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ جموں و کشمیر محبوبہ مفتی نے منگل کے روز کہا کہ انہوں نے پنجاب کے وزیر اعلیٰ بھگونت مان سے کشمیری مٹن تاجروں کو درپیش مبینہ مشکلات اور ہراسانی کے معاملے پر بات کی ہے۔
محبوبہ مفتی نے سوشل میڈیا پلیٹ فارم ایکس پر ایک پوسٹ میں کہا کہ انہیں اطلاعات موصول ہوئی تھیں کہ کشمیر کے مٹن تاجر پنجاب کے مادھوپور اور شمبھو بارڈر پر مویشیوں کی نقل و حمل کے دوران ’’کیٹل فیئر ایکٹ‘‘ کے نام پر روکے جا رہے ہیں اور انہیں مشکلات کا سامنا کرنا پڑ رہا ہے۔
انہوں نے کہا، ’’میں نے پنجاب کے وزیر اعلیٰ بھگونت مان جی سے کشمیری مٹن تاجروں کے بارے میں بات کی، جنہیں مبینہ طور پر مادھوپور اور شمبھو بارڈر پر روکا جا رہا ہے اور ہراساں کیا جا رہا ہے۔ انہوں نے فوری کارروائی کی یقین دہانی کرائی ہے۔‘‘
محبوبہ مفتی نے اس معاملے میں مداخلت پر بھگونت مان کا شکریہ ادا کرتے ہوئے امید ظاہر کی کہ مسئلہ جلد از جلد حل کر لیا جائے گا۔
واضح رہے کہ حالیہ دنوں میں تاجروں کے بعض حلقوں کی جانب سے یہ شکایات سامنے آئی تھیں کہ جموں و کشمیر سے باہر مویشیوں کی تجارت اور نقل و حمل کے دوران انہیں مختلف رکاوٹوں کا سامنا کرنا پڑ رہا ہے۔
