امت نیوز ڈیسک //
عام آدمی پارٹی نے جمعے کے روز یہاں احتجاج کرتے ہوئے الزام عائد کیا کہ بی جے پی جموں وکشمیر میں اسمبلی انتخابات منعقد کرنے کو ٹال رہی ہے۔
احتجاجی جم کر نعرہ بازی کر رہے تھے اور انہوں نے ہاتھوں میں پلے کارڈس بھی اٹھا رکھے تھے۔
اس موقع پر ہرش دیو سنگھ نے میڈیا کے ساتھ بات کرتے ہوئے کہا کہ ایسا لگتا ہے کہ بی جے پی کے کہنے پر جموں و کشمیر میں چناؤنہیں کروائے جارہے ہیں۔
سنگھ نے کہا”چناؤ کو لگاتار ٹالا جا رہا ہے بی جے پی زمینی سطح پر اکھڑ چکی ہے اب الیکشن کمیشن پر دباؤ ڈالا جا رہا ہے “۔
ان کا کہنا تھا کہ سال2018 میں یہاں اسمبلی بند ہوئی ہے تب سے یہاں جمہوری نظام کو بحال نہیں کیا جا رہا ہے۔
سنگھ نے کہا کہ بی جے پی اپنے منظور نظر لیڈروں کے ذریعے جموں و کشمیر میں حکومت چلانا چاہتی ہے ۔ان کا الزام تھا کہ یہاں رشوت کا بول بالا ہے اور لوگوں کی کوئی شنوائی نہیں ہو رہی ہے۔
