امت نیوز ڈیسک //
جموں وکشمیر عوامی مجلس عمل کے سربراہ میرواعظ ڈاکٹر مولوی محمد عمر فاروق نے وادی کشمیر کے سرکردہ اور نامور ادیب، صحافی، شاعر اور قلمکار جناب غلام نبی خیال کے انتقال پر گہرے رنج و غم کا اظہارکرتے ہوئے انکی علمی، ادبی، صحافتی اور سماجی خدمات کیلئے ان کو خراج تحسین پیش کیا۔
اپنے تعزیتی بیان میں میرواعظ نے کہا کہ مرحوم خیال صاحب کی انکے ساتھ قریبی راہ و رسم تھی اور خاندان میرواعظین خصوصاً بانی تنظیم مولانا محمد فاروق کے ساتھ ان کے قریبی اور دیرینہ تعلقات تھے۔
مرحوم کے انتقال کو ایک عظیم نقصان قرار دیتے ہوئے انہوں نے کہا کہ انکے چلے جانے سے کشمیر کے ادبی، علمی اور صحافتی حلقوں میں ایک خلا پیدا ہو گیا ہے جس کو مشکل سے ہی پر کیا جاسکتا ہے۔
میرواعظ نے مرحوم خیال صاحب کے فرزندان کے ساتھ اس سانحہ پر اپنی دلی تعزیت اور ہمدردی کا اظہار کرتے ہوئے مرحوم کے بلند درجات اور جنت نشینی کی دعا کی۔
انہوں نے کہا کہ زبان و ادب کے تئیں مرحوم خیال صاحب کی خدمات کو تادیر یاد کیا جائیگا۔
دریں اثنا میرواعظ نے آثار شریف پنجورہ کے متولی جناب میر بشیر احمد کی اہلیہ کے انتقال پر رنج و غم کا اظہار کرتے ہوئے جناب میر بشیر احمد کے ساتھ اس سانحہ پر اپنی دلی تعزیت اور ہمدردی کا اظہار کیا۔(یو این آئی)
