امت نیوز ڈیسک //
نئی دہلی : بالآخر وہ دن آ ہی گیا جس کا ہندوستانی کرکٹ شائقین سمیت پوری دنیا کو انتظار تھا۔ ورلڈ کپ 2023 میں بدھ کو نیوزی لینڈ کے خلاف سیمی فائنل میچ میں ہندوستان کے وراٹ کوہلی نے اپنی 50 ویں ون ڈے سنچری بناکر ماسٹر بلاسٹر سچن تیندولکر کا ریکارڈ توڑ دیا۔ ایک بہت بڑا کارنامہ انجام دے کر وراٹ نے سچن کا ریکارڈ توڑ دیا ہے جسے سات آٹھ سال پہلے تک چھونا تقریباً ناممکن سمجھا جاتا تھا۔
خاص بات یہ ہے کہ اس ریکارڈ کو توڑنے کے لئے ویرات نے سچن تیندولکر کے ہوم گراؤنڈ ممبئی کے وانکھیڑے اسٹیڈیم اور ماسٹر بلاسٹر کے ڈیبیو کی تاریخ کا انتخاب کیا۔ سچن نے 34 سال پہلے 15 نومبر 1989 کو پاکستان کے خلاف ٹیسٹ کے ذریعے اپنے بین الاقوامی کرکٹ کا آغاز کیا تھا۔ وراٹ نے اننگز کے 42ویں اوور میں لوکی فرگوسن کی گیند پر دو رن لے کر اپنی ‘ریکارڈ بریکنگ’ سنچری مکمل کی۔ میدان پر موجود سچن تیندولکر بھی ان کی اس کامیابی پر کافی خوش تھے۔اس دوران انہوں نے 106 گیندوں کا سامنا کیا اور آٹھ چوکے اور ایک چھکا لگایا ۔
بتادیں کہ چار سال قبل ورلڈ کپ 2019 کے سیمی فائنل میں وراٹ نیوزی لینڈ کے خلاف صرف 1 رن بنا کر آؤٹ ہو گئے تھے، انہوں نے اسی حریف ٹیم کے خلاف سیمی فائنل میں سنچری بنا کر اس کی تلافی کی۔ بالآخر وراٹ کی اننگز 117 رنز کے اسکور پر ختم ہوئی، وہ ٹم ساؤتھی کی گیند پر ڈیون کونوے کے ہاتھوں کیچ آؤٹ ہوئے۔ اس اننگز میں نو چوکے اور دو چھکے شامل تھے۔
