امت نیوز ڈیسک //
سری نگر، 20 مارچ (جی این ایس): یہاں کی ایک مقامی عدالت نے فیس بک کے ایڈمن کو ایک غیر سرکاری تنظیم (این جی او) "سمائل فاؤنڈیشن” کی طرف سے مبینہ طور پر اس کے خلاف "منفی ویڈیوز” کو گردش کرنے پر دائر ہتک عزت کی درخواست میں نوٹس جاری کیا ہے۔
ایک حکم میں، منصف/سب رجسٹرار سری نگر عدنان منظور نقشبندی کی عدالت نے جی این ایس کے مطابق مدثر بشیر عرف مدثر عزیز نامی ایڈمن کو ‘این جی او کے معاملات میں مداخلت کرنے یا تنظیم سے متعلق کوئی ویڈیو اپ لوڈ کرنے سے روک دیا۔’
عدالت نے ایڈمن کو یہ بھی ہدایت کی کہ وہ اس کیس سے متعلق تمام مواد کو اپنے فیس بک پیجز سے ہٹا دیں۔ عدالت نے ایڈمن سے بھی کہا ہے کہ وہ 26 مارچ کو ہونے والی اگلی سماعت تک نوٹس کا جواب دیں۔ عدالت میں مدعی این جی او کی نمائندگی طالب حسین اور سیرت مہراج نے کی۔
درخواست کے مطابق، مدثر ‘کشمیر یوتھ پاور’، ‘نیوز ایکسپریس’، ‘مشن کشمیر’ اور مدثر عزیز’ کے ناموں سے متعدد فیس بک پیجز کو چلا رہا ہے اور "لوگوں کو بدنام کرنے اور ذاتی رنجشیں طے کرنے کے لیے صحافی کا روپ دھار رہا ہے”۔ . (جی این ایس)
