امت نیوز ڈیسک //
سری نگر: جموں وکشمیر پولیس نے جنوبی کشمیر کے ضلع کولگام کے موڈر گام میں ملی ٹنٹوں کو پناہ دینے کے الزام میں ایک رہائشی مکان کو یو اے پی ایکٹ کے تحت ضبط کیا ہے۔پولیس کے مطابق یہ مکان ایک انکائونٹر میں مکمل طور پر تباہ ہوا تھا اور جمعرات کو موقع پر پہنچ کر اس کو ضبط کیا گیا۔
ایک پولیس ترجمان نے اپنے ایک بیان میں کہا: ‘پولیس نے جنوبی کشمیر کے ضلع کولگام کے موڈرگام میں صفدر علی ڈار کے رہائشی مکان کو ملی ٹنٹوں کو پناہ دینے کے الزام میں ضبط کیا’۔
انہوں نے کہا کہ اس ضمن میں پولیس اسٹیشن کولگام میں ایک ایف آئی آر زیر نمبر100/2024 درج کیا گیا تھا۔ترجمان نے بتایا کہ یہ مکان انکائونٹر میں مکمل طور پر تباہ ہوا تھا۔
پولیس نے اس جگہ پر ایک سائن بورڈ نصب کیا ہے جس پر لکھا ہے:’عوام الناس کو یہ اطلاع دی جاتی ہے کہ موڈرگام کولگام کے صفدر علی ڈار کے نام پر رجسٹرڈ سروے نمبر 214 خسرہ نمبر 360 کے تحت زمین پر تعمیر شدہ مکمل طور پر تباہ شدہ رہائشی مکان کو 25 یو اے پی ایکٹ 1967 کے تحت منجمد یا ضبط کر لیا گیا ہے’۔
ذرائع کے مطابق یہ مکان 6 جولائی 2024 کو ایک انکائونٹر کے دوران تباہ ہوا تھا اور اس میں ایک پیرا کمانڈر اور دو ملی ٹنٹ جاں بحق ہوئے تھے۔
