اُمت نیوز ڈیسک//
فلسطینی عسکری تنظیم حماس نے کہا ہے کہ وہ فلسطینی ریاست کے قیام تک وقت تک ہتھیار نہیں ڈالے گی۔برطانوی خبر رساں ایجنسی روئٹرز کے مطابق حماس نے سنیچر کو اپنے ایک بیان میں کہا ہے کہ وہ ’مزاحمت اور ہتھیار‘ رکھنے کے اپنے حق کو اس وقت تک ترک نہیں کرے گی جب تک کہ ’ایک آزاد اور مکمل خودمختار فلسطینی ریاست‘ قائم نہیں کر دی جاتی جس کا دارالحکومت یروشلم ہو۔
قطر اور مصر جو جنگ بندی کی کوششوں میں ثالثی کر رہے ہیں، نے فرانس اور سعودی عرب کے اس اعلان کی توثیق کی جس میں اسرائیل فلسطین تنازع کے دو ریاستی حل کے لیے اقدامات کا خاکہ پیش کیا گیا تھا اور کہا گیا تھا کہ حماس اپنے ہتھیار مغربی حمایت یافتہ فلسطینی اتھارٹی کے حوالے کر دے۔
سعودی عرب اور فرانس نے اقوام متحدہ میں ایک مشترکہ اعلامیہ جاری کیا تھا جس میں غزہ میں جنگ کے فوری خاتمے پرزور دیا گیا۔ اسرائیل، فلسطین تنازع کے دو ریاستی حل کے نفاذ کےلیے ایک تفصیلی روڈ میپ کی وضاحت کی گئی ہے۔
اعلامیے میں کہا گیا تھا کہ مصر قطر اور امریکہ کی ثالثی میں فوری طور پرایک مرحلہ وارجنگ بندی کے معاہدے کے نفاذ پر زور دیا گیا تاکہ لڑائی کا ختم ہوسکے، یرغمالیوں کی بحفاظت رہائی کو یقینی بنایا اور اسرائیلی فوجیوں کا غزہ سے انخلا ممکن بنایا جائے۔
اسرائیل حماس کی جانب سے ہتھیار ڈالنے کو تنازع کے خاتمے کے لیے کسی معاہدے پر پہنچنے کی اہم شرط سمجھتا ہے تاہم حماس بارہا کہہ چکی ہے کہ وہ اپنے ہتھیار ڈالنے کے لیے تیار نہیں ہے۔
گزشتہ ماہ اسرائیلی وزیراعظم بنیامین نیتن یاہو نے مستقبل کی کسی بھی آزاد فلسطینی ریاست کو اسرائیل کو تباہ کرنے کا پلیٹ فارم قرار دیتے ہوئے کہا تھا کہ ’یہی وجہ ہے کہ فلسطینی علاقوں پر سکیورٹی کنٹرول اسرائیل کے پاس ہی رہنا چاہیے۔‘
انہوں نے فلسطینی ریاست کو تسلیم کرنے کے منصوبے کا اعلان کرنے پر برطانیہ اور کینیڈا سمیت متعدد ممالک کو تنقید کا نشانہ بناتے ہوئے اس اقدام کو حماس کے طرز عمل کا انعام قرار دیا۔
140 سے زائد ممالک پہلے ہی فلسطین کو بطور ریاست تسلیم کر چکے ہیں۔
