اُمت ڈیسک رپورٹ//
سوشل میڈیا پر وائرل ہونے والی ایک وڈیو نے لیبیا اور مصر میں شدید غم و غصے کو جنم دیا ہے۔ وڈیو میں ایک لیبیائی شہری نے مذاق اور تفریح کے لیے اپنے فارم پر کام کرنے والے مصری مزدور پر شیر چھوڑ دیا۔
وڈیو میں دیکھا جا سکتا ہے کہ مصری مزدور خوف اور گھبراہٹ کی حالت میں ہے، جبکہ شیر نے اپنے پنجوں سے اسے جکڑ لیا اور پھر اس کے کندھے پر کاٹنے کی کوشش بھی کی۔ مزدور کے چہرے پر شدید دہشت کے آثار نمایاں تھے اور اس نے بتایا کہ اسے درد اور زخم آئے ہیں۔ دوسری جانب فارم کا مالک یہ منظر قہقہوں کے ساتھ ریکارڈ کر رہا تھا اور مزدور سے کہہ رہا تھا کہ خاموش رہے تاکہ وہ شیر کے "مزے” کو جاری رکھ سکے، اس بات کی پروا کیے بغیر کہ یہ درندہ مزدور کو شدید زخمی کر سکتا ہے۔
ان مناظر نے، جو مبینہ طور پر لیبیا میں فلمائے گئے، سماجی پلیٹ فارموں پر سخت مذمت کا دروازہ کھول دیا۔ عوامی حلقوں نے اسے "انسانی وقار کی توہین” اور "انسانی جانوں سے کھیل” قرار دیتے ہوئے ملوث شخص کو سزا دینے کا مطالبہ کیا۔
https://x.com/gulftoday/status/1957482572185006230
یہ بات قابل ذکر ہے کہ لیبیا میں درندوں کو پالنے کا رجحان عام ہے۔ کئی بار دیکھا گیا ہے کہ شہری شیر اور چیتے اپنے ساتھ سڑکوں، عوامی مقامات اور رہائشی محلوں میں گھماتے ہیں۔ واضح رہے کہ اس حوالے سے حکومتی فیصلہ موجود ہے جو گھروں، فارموں اور نجی مقامات پر درندے پالنے پر پابندی عائد کرتا ہے۔
