امت نیوز ڈیسک //
سرینگر، 19 اگست : صرف 48 گھنٹے کے اندر ہی اُس وقت سنسنی خیز موڑ آیا جب گاندربل کے بٹسر-سہ پورہ روڈ پر 14 سالہ لڑکی کی لاش برآمد ہونے کے بعد پولیس نے اس کی بہن کو گرفتار کرلیا۔
ایک پریس کانفرنس سے خطاب کرتے ہوئے ایس ایس پی گاندربل خلیل پوسوال نے بتایا کہ 22 سالہ لڑکی (مرحومہ کی بہن) کو اس واقعے کے سلسلے میں گرفتار کیا گیا ہے۔ انہوں نے کہا کہ واقعہ پیش آتے ہی پولیس نے کیس درج کرکے تحقیقات شروع کیں اور دورانِ تحقیقات یہ انکشاف ہوا کہ کمسن لڑکی کو اس کی اپنی بہن نے قتل کیا۔
ایس ایس پی کے مطابق دونوں بہنوں کے درمیان جھگڑا ہوا تھا جو شدت اختیار کرگیا اور بڑی بہن نے چھوٹی بہن کو لوہے کی راڈ سے مارا، جس کے نتیجے میں اُس کی موت واقع ہوگئی۔
وزیراعلیٰ عمر عبداللہ نے اس قتل کو بہیمانہ قرار دیتے ہوئے گہرے دکھ اور افسوس کا اظہار کیا۔ انہوں نے مطالبہ کیا کہ کمسن کے قتل میں ملوث مجرموں کو سخت ترین سزا دی جائے۔ (جی این ایس)
