امت نیوز ڈیسک //
سری نگر، 25 جنوری:جموں و کشمیر کے وزیر اعلیٰ عمر عبداللہ نے اتوار کے روز بھارتیہ جنتا پارٹی (بی جے پی) پر سابقہ ریاست کو تقسیم کرنے کا الزام عائد کرتے ہوئے کہا کہ ان کی پارٹی ہمیشہ ایک متحد جموں و کشمیر کی حامی رہی ہے، جس میں لداخ بھی شامل ہے۔
عمر عبداللہ یہ بیان بی جے پی کے قومی جنرل سیکریٹری ترون چھگ کے اس بیان کے جواب میں دے رہے تھے، جس میں انہوں نے کہا تھا کہ بی جے پی ایک مکمل طور پر متحد جموں و کشمیر کی حامی ہے، جس میں پاکستان کے زیر قبضہ کشمیر (پی او کے) بھی شامل ہے۔
وزیر اعلیٰ نے خبر رساں ایجنسی کشمیر نیوز سروس (کے این ایس) سے بات کرتے ہوئے کہا،
"یہ اچھی بات ہے کہ انہوں نے ایسا کہا، لیکن جموں و کشمیر کی تقسیم کا تصور خود بی جے پی نے پیش کیا تھا۔”
انہوں نے کہا،”ہم ہمیشہ چاہتے تھے کہ جموں و کشمیر ایک ہی اکائی کے طور پر قائم رہے۔ لداخ کو جموں و کشمیر سے الگ کرنے کا فیصلہ بی جے پی نے کیا، اور آج بھی ہم لداخ کو دوبارہ جموں و کشمیر کے ساتھ شامل کرنے کا مطالبہ کرتے ہیں۔”
عمر عبداللہ نے مزید کہا کہ ان کی پارٹی نے کبھی جموں کو کشمیر سے الگ کرنے کی حمایت نہیں کی۔
"جموں و کشمیر کو کبھی تقسیم نہیں کیا جانا چاہیے تھا۔ ہم جموں کو کشمیر سے الگ کرنے کے حق میں نہیں ہیں۔ یہ بی جے پی اور کشمیر میں اس کے کچھ اتحادی ہیں جو اس طرح کے تفرقہ انگیز بیانیے کو فروغ دیتے ہیں،” انہوں نے کہا۔
اس سے قبل ترون چگ نے کہا تھا کہ بی جے پی ایک مکمل طور پر متحد جموں و کشمیر پر یقین رکھتی ہے، جس میں پاکستان کے زیر قبضہ کشمیر کے علاقے بھی شامل ہیں۔ انہوں نے یہ بھی کہا کہ پارٹی پورے خطے میں مساوی ترقی کے لیے پرعزم ہے اور دیگر سیاسی جماعتوں کی جانب سے پھیلائی جانے والی "تقسیم پسند سیاست” کی مذمت کی۔(کے این ایس)
