امت نیوز ڈیسک //
راجوری : جموں و کشمیر کے ضلع راجوری میں دریا عبور کرنے کی ایک فوجی مشق کے دوران لاپتہ ہونے والے فوجی اہلکار کی لاش منگل کے روز برآمد کر لی گئی، حکام نے بتایا۔
فوجی اہلکار کی شناخت سپاہی اکشت شرما کے طور پر ہوئی ہے۔ ان کی لاش آج صبح منوار نالہ سے نکالی گئی۔ تلاش اور بچاؤ کی اس کارروائی میں فوج کے ساتھ ساتھ این ڈی آر ایف اور مقامی رضاکاروں نے بھی حصہ لیا۔
حکام کے مطابق سپاہی اکشِت شرما پیر کے روز تقریباً دوپہر 12 بجے اس وقت لاپتہ ہوگئے تھے جب فوج کی جانب سے دریا عبور کرنے کی تربیتی مشق جاری تھی۔ یہ مشق راجوری کے علاقے سندر بنی کے قریب کی جا رہی تھی۔
فوج نے بتایا کہ اہلکار کے لاپتہ ہونے کے بعد فوری طور پر بڑے پیمانے پر سرچ آپریشن شروع کیا گیا، جس میں فوج اور سول اداروں کے تمام دستیاب وسائل استعمال کیے گئے۔ بالآخر مشترکہ تلاش ٹیم نے آج صبح منوار نالے سے ان کی لاش برآمد کر لی۔
حکام کے مطابق واقعے کی مزید تحقیقات جاری ہیں۔
