امت نیوز ڈیسک //
نئی دہلی، 15 مارچ: الیکشن کمیشن آف انڈیا نے چار ریاستوں اور ایک مرکز کے زیر انتظام علاقے میں اسمبلی انتخابات کے شیڈول کا اعلان کر دیا ہے۔ انتخابات کا آغاز 9 اپریل سے ہوگا جبکہ ووٹوں کی گنتی 4 مئی کو کی جائے گی۔
الیکشن کمیشن کے مطابق آسام، کیرالا اور پڈوچیری میں 9 اپریل کو ایک ہی مرحلے میں پولنگ ہوگی۔
مغربی بنگال میں انتخابات دو مرحلوں میں ہوں گے۔ پہلے مرحلے کی ووٹنگ 23 اپریل جبکہ دوسرے مرحلے کی ووٹنگ 29 اپریل کو ہوگی۔
تمل ناڈو میں بھی 23 اپریل کو ایک ہی مرحلے میں ووٹنگ ہوگی۔
چیف الیکشن کمشنر گیانیش کمار نے نئی دہلی میں پریس کانفرنس کے دوران انتخابات کو جمہوریت کا تہوار قرار دیتے ہوئے نوجوانوں اور پہلی بار ووٹ دینے والوں سے اپیل کی کہ وہ اس جمہوری عمل میں بھرپور حصہ لیں اور اپنے حقِ رائے دہی کا استعمال کریں۔
الیکشن کمیشن کے مطابق تمام ریاستوں اور مرکز کے زیر انتظام علاقے میں ووٹر فہرستوں کی خصوصی نظر ثانی مکمل ہو چکی ہے اور حتمی انتخابی فہرستیں جاری کر دی گئی ہیں۔
مغربی بنگال کی 294 نشستوں، آسام کی 126 نشستوں، کیرالا کی 140 نشستوں، تمل ناڈو کی 234 نشستوں اور پڈوچیری کی 30 نشستوں کے لیے انتخابات منعقد ہوں گے۔
