امت نیوز ڈیسک //
پی ڈی پی صدر محبوبہ مفتی نے کہا ہے کہ اسلام ایران کے راستے کشمیر پہنچا اور کشمیری عوام کے ایران کے ساتھ گہرے تاریخی، ثقافتی اور روحانی تعلقات ہیں۔ انہوں نے ایران کے عوام کے ساتھ یکجہتی کا اظہار کرتے ہوئے ایک قرارداد بھی منظور کی۔
انہوں نے یہ بات سرینگر میں پارٹی کے سینئر رہنماؤں کے اجلاس کی صدارت کرتے ہوئے کہی، جہاں پارٹی کی کارکردگی اور موجودہ سیاسی صورتحال پر بھی تبادلہ خیال کیا گیا۔
محبوبہ مفتی نے کہا کہ موجودہ بحران کے دوران کشمیر کے لوگ ایران کے عوام کے امن و سلامتی کے لیے دعاگو ہیں۔ انہوں نے کشمیری عوام کی جانب سے ایران کے ساتھ ہمدردی اور یکجہتی کے اظہار کو سراہا اور اپیل کی کہ رمضان المبارک کے آخری ایام میں ایران کے لیے خصوصی دعائیں کی جائیں۔
پی ڈی پی صدر نے مسلم ممالک سے بھی اپیل کی کہ وہ موجودہ بحران میں ایران کی مدد کے لیے آگے آئیں۔ انہوں نے حکومتِ ہند سے بھی مطالبہ کیا کہ وہ ایران کے ساتھ کھڑی ہو کیونکہ ایران مشکل اوقات میں بھارت کا مستقل دوست رہا ہے۔
اس موقع پر محبوبہ مفتی نے ایران کی صورتحال سے متعلق احتجاج اور مجالس کے دوران نوجوانوں کی گرفتاریوں کا معاملہ بھی اٹھایا اور جموں و کشمیر کے لیفٹیننٹ گورنر اور ڈائریکٹر جنرل آف پولیس سے اپیل کی کہ گرفتار نوجوانوں کو رہا کیا جائے۔
اجلاس میں پارٹی رہنماؤں نے جموں و کشمیر کے مختلف اضلاع میں پارٹی کی تنظیمی سرگرمیوں اور عوامی رابطہ مہم کا بھی جائزہ لیا۔
