امت نیوز ڈیسک //
اننت ناگ، 29 مارچ : اینٹی کرپشن بیورو نے اتوار کو اننت ناگ کے علاقے لارنو پولیس اسٹیشن کے اسپیشل پولیس افسر (SPO) امتیاز احمد بھٹ کو 18,000 روپے رشوت لیتے ہوئے گرفتار کر لیا۔
ملزم کو کوکرناگ کے لارنو پولیس اسٹیشن میں تعینات کیا گیا تھا۔ یہ کارروائی ایک شکایت کے بعد عمل میں آئی، جس میں مبینہ طور پر گاڑی کے دستاویزات کی رہائی کے لیے غیر قانونی رقم مانگنے کی اطلاع دی گئی تھی۔
شاکی نے بتایا کہ 26 مارچ کو وہ ماٹی سے بڈیہار جا رہا تھا جب پولیس ناکہ پارٹی نے اسے بڈیہار پل پر روکا اور گاڑی کی تلاشی لی لیکن دستاویزات واپس نہ کیں، بلکہ اگلے دن لارنو پولیس اسٹیشن آنے کا کہا۔
شاکی کے مطابق 27 مارچ کو پولیس اسٹیشن میں اسپیشل پولیس افسر نے 30,000 روپے رشوت مانگی، جو بعد میں فون پر 25,000 روپے اور آخر کار 18,000 روپے پر طے پائی۔ شاکی نے رشوت دینے کی بجائے اے سی بی سے رابطہ کیا۔
ACB نے شکایت کی تصدیق کے بعد چھاپہ مار ٹیم تشکیل دی، جس نے ملزم کو رشوت لیتے ہوئے رنگے ہاتھوں گرفتار کر لیا۔ رشوت کی رقم بھی ملزم کے قبضے سے ضبط کر لی گئی۔
بعد میں ملزم کے گھر بھی تلاشی لی گئی۔ مزید تفتیش جاری ہے۔
